...................................
البارحه كلمتني بنت مبليه
معاملتها صراحه معي تعبانه
قالت كيف الحال قلت اهلين يابنيه
قالت بغيت البنات وقلت غلطانه
قالت بلاشي دلع ورح ناد بدريه
وان كانها نايمه صوت لسلطانه
قلت بصراحه ترى حنا عزوبيه
والكل منا يابنت الناس في شانه
قالت تغشمر وقلت احكي بجديه
انا رجل والرجل ممسوك بلسانه
قالت ابسولف معك لو تسمح شويه
تراي قبل اتصل بك كنت طفشانه
قلت اهرجي معي زين وصفي النيه
وانا ابسولف عليك بنيه زانه
قالت بغيت اسالك وش بعد سوريه
والهند كانك ذكي وش كثر سكانه
قلت بصراحه ماعرف الا البجاديه
واعرف من حد مكه لين غيلانه
قالت تحب قلت احب اللي حواليه
واحب ربي واحب الكنج واخوانه
واحب ديني واحب ارض السعوديه
محبة ماعطاها الخل لخلانه
قالت بضحكه ليه اخلاقك تجاريه
اصلا انا يوم ادردش معك خسرانه
وانت بدوي ماتعلمت الرومنسيه
وكل بدوي حياته مالها خانه
قلت اسمعي زين ان كنتي طبيعيه
لكن اظنك يابنت الناس .... سكرانه
انا بدوي ماحنيت الراس موليه
الا لربي عزيز الجاه سبحانه
انا بدوي تفتخر كل العرب فيه
انا بدوي يموت العهد ماخانه
حنا بدو بدو بدو ان ثارت الهيه
نثبت ليا خالط البارود دخانه
حنا بدو لنكشف ستر السنافيه
يفرح بنا اللي خذو ذوده بحيرانه
حنا بدو ان كوينا ننضج الكيه
يفرح بنا اللي يشوف الضيم باعيانه
حنا بدو بدو دايم نارنا حيه
نزعل ليا صك راع البيت بيبانه
حنا بدو لالفو من بعد طرقيه
نفرح بهم فرحه الغايب بورعانه
ياللي تقولين بدو اقول يابنيه
الاصل حنا وعز البيت سيسانه
